鄧月平做單身狗 拒絕收兵
藝人鄧月平（Larine）樣子標致兼性格貼地，俘虜不少宅男心。她曾獨自炮製20人分量的聖誕大餐，絕對入得廚房、出得廳堂！雖然有「娘娘」級數，但她拒絕收兵，揚言處於事業搏殺期，甘願單身做「住家女」!
擁35F驕人上圍的鄧月平是不少男士的理想對象，不過原來她未試過與男友共度聖誕，反而相約一班好友齊齊開P。對煮食甚有研究的Larine，試過炮製20人分量的聖誕大餐：「嗰次我喺屋企開派對，一個人煮20人嘅大餐，整咗火雞、羊架、意粉同甜品，真係第一次煮咁多人嘅分量，煮到身水身汗，不過我好享受，大家又讚好味，好有滿足感。」
送禮「嘩」一聲
她自爆試過交換禮物時，想了一份「別出心裁」的禮物：「交換禮物主題係要令人嘩一聲，但因為我掛住煮飯，完全唔記得買禮物 ，所以拎咗伴碟嘅車厘茄放喺戒指盒入面，收到嗰位朋友真係嘩一聲！好彩我啲朋友一樣，有個喺聖誕襪放咗個雪梨，有啲就放奇異果，真係層出不窮嘅『嘩』。」
唔鍾意靚仔
作為女神，Larine理應追求者眾，不少男士甘願做「兵」，但她坦言現時沒有追求者：「我依家唔恨拍拖，都大個女啦，對自己嘅目標更加清晰，所以唔想拍拖，想專心工作先。同埋我唔想拍拖，就唔會畀人追，亦都唔使派『好人卡』。」提到現時興忘年戀，她表示不抗拒，並自爆不喜歡靚仔：「我思想比較開放，唔會抗拒忘年戀，因為係人生嘅一種經歷，可能拍戲會接到呢啲角色。同埋我唔鍾意靚仔，鍾意特別同有才華嘅人，總之第一眼要好合眼緣。」
場地：天慶