無綫避激化矛盾 馬蹄露戲份被「私了」
由楊千嬅、周柏豪與朱晨麗等演出的無綫台慶劇《多功能老婆》，播出以來話題多多，繼熱爆「小三」題材後，前晚原本出現馬蹄露與警察的戲份竟「被消失」，相信與近月的社會運動有關。
反修例運動持續半年，警民不時發生嚴重衝突，不少藝人更捲入雙方矛盾，其中馬蹄露曾因與示威人士爭執而被「私了」，引起廣泛關注，想不到連工作亦受牽連！她在《多功能老婆》中有一段與警察的戲份原定前晚播出，結果卻「被消失」，相信無綫不想激化敏感話題而自我審查，最後引刀一快，索性刪剪這場口。
問到是否有大量戲份被刪？馬蹄露回覆：「呢套劇我唔係演警察，只係有一屋警察家人。（介意被刪戲？）套劇根本只係客串，場戲亦唔多！」記者亦向《多》劇總監製陳寶華了解，她說：「以我所知，馬蹄露有約2、3秒嘅對白被淡化咗，但唔影響大局！」
黎燕珊望「乖女」台慶攞獎
一班《多》劇演員昨日出席宣傳活動，講到劇集在myTV SUPER的點擊最高，與黎燕珊演母女的朱晨麗（朱朱）開心表示多謝支持，又指觀眾很喜歡這對母女組合。黎燕珊就讚朱朱戲內戲外都是其「乖乖女」，現時更以母女相稱，感情很好，希望「乖女」可在頒獎禮上攞獎。
下周踏入結局篇，問可會相約睇大結局？朱朱笑說：「我Anytime得閒！隨時候命。（想拍續集？）梗係想啦！同埋我哋呢個組合拍得好過癮、開心。」至於另一半可有追看？她抵死問：「我另一半？緋聞男友？姓何（指何廣沛）嗰個？咁你要問佢，見佢都有睇我啲Post，有點讚留言嘅！希望佢有追睇，但唔好驚咗戲中嘅我。（驚你打佢？）其實現實中我係收斂少少嘅，好斯文o架！都有問啲男性朋友覺得點，會唔會太巴辣呢？但佢哋又話唔怕，都欣賞嘅！」