美國饒舌天后Cardi B上年曾與偷食老公Offset分手，之後復合，今年老公28歲生日，她大手筆送上50萬美元（約390萬港元）現金做禮物！
去年12月，Cardi B得悉結婚兩年的美國饒舌男歌手老公Offset偷食後，宣布分手，但之後心軟復合。Offset上周六28歲生日，Cardi B決定送大禮，並拍片記錄整個過程。片中，Cardi B對老公說：「所有人都話你有晒所有車，有晒所有珠寶首飾……我仲可以送啲咩嘢畀個有晒所有嘢嘅人？雪櫃！」Offset隨即打開雪櫃，入面竟放了一疊疊、共50萬美元現金！
Offset笑到見牙唔見眼，Cardi B表示：「我唔知畀咩你，但都要畀啲嘢你。你可以用嚟買車、買多啲衫、買珠寶、買多啲名貴手袋。仆X，你可以買你想要嘅嘢。生日快樂！但唔好預我送聖誕禮物畀你，X樣。唔會有聖誕禮物，聖誕禮物只會畀仔女。我愛你。」除此之外，她又為老公大搞生日派對，請來一班脫衣舞孃圍住老公跳舞。
慶祝完Offset生日，Cardi B又帶老公參加饒舌天王老友Diddy的生日派對，同場參加者包括Beyonce與老公Jay-Z、真人騷女星Kim Kardashian與老公Kanye West、Kylie Jenner、里奧勒度狄卡比奧（Leonardo DiCaprio）、娜奧美金寶（Naomi Campbell）、前NBA球星高比拜仁（Kobe Bryant）、Usher、Kevin Hart、The Weeknd與French Montana等，相當熱鬧。當中Kanye與不和多年的Jay-Z在場內世紀握手，冰釋前嫌！