「造星Ⅱ」MC倒灶 留位畀亡父 Phoebus奪冠變喊包
ViuTV《全民造星Ⅱ》前晚由吳啟洋（Phoebus）擊敗大熱張天賦（MC）贏得「造星Ⅱ」冠軍，屈居亞軍的MC心服口服認輸。Phoebus贏獎亦贏友誼，獲獎一刻他激動爆喊，其他敗北戰友紛紛上前擁抱祝賀。
10位參賽者進行最終一戰，各人施展渾身解數，經過三個回合，Phoebus又唱又跳加樂器的全面性，得到最後勝利成為冠軍。賽後他與MC及季軍得主李祉均（Oscar）接受訪問，Phoebus表示百感交集，直認曾為首回合演出時耳機失靈而在後台爆喊：「當刻好嬲自己，唔可以畀完美嘅表演人哋睇，呢個位係令自己最唔開心，好彩我喊嘅同時，亦有好多人叫我冷靜，因緊接仲要應付其他表演。」評判之一的霍汶希讚他執生快，他表示多謝各位評判。
問到大熱倒灶的MC可有失望？他說：「輸呢場仗我係心服口服，因為《造星》係需要一個全能嘅藝人，Phoebus的而且確係，我遺憾係爸爸睇唔到（上月張父因病離世），應承過爸爸留個位畀佢，佢揀咗個好舒服嘅地方睇住我，佢睇到我決賽、睇到我攞到名次。」問季軍Oscar之後可會多做商業幕前演出？他反問如何界定商業界線？但應承會多作演出。
Tank托女友胸話收斂
被視為舞功了得的梁德忠（Tank）在首回合演出時玩爆肌，更再次出動女友大跳辣身舞，他從後雙手托着女友胸部，意識露骨大膽。問他可有問准大會？他說：「問咗，已經收斂同cut咗好多啦！」又稱原先想有個水池玩濕身，但因舞台問題，由4米4水池變了枝裝水。
評判之一的林珊珊稱給MC最高分，至於想簽哪位？她笑說：「我哋幾個評判都想簽Justin，首先問下ViuTV嚟做評判係咪可以簽人先。」不過，她提醒十位參賽者要學好咬字和發音，不能單靠台型。