戴辛尉嫁梁佩瑚細佬年紀大趕造人

現年43歲的「謝霆鋒初戀情人」、名唱歌老師戴思聰孻女戴辛尉，昨日與前港姐梁佩瑚的45歲弟弟梁焯皓結束愛情長跑，花7位數在酒店舉行婚宴，筵開34席。早上接新娘前，載兄弟姊妹團的小巴發生意外，眾人臨時改乘60座大巴，幸好趕及吉時進行儀式。

穿中式禮服的新郎在胞弟梁焯滿幫忙下，成功將姊妹團開價99,999元開門利是，傾到999.9元，氣氛熱鬧，而辛尉的姊妹團只有嚴淑明是圈中人。

二人甜蜜咀嘴。	梁佩瑚與老公恩愛出席婚宴。	梁焯滿強調是梁焯皓的弟弟。

咀嘴晒恩愛

穿低胸大露背潮式嫁衣的辛尉，翹實母親臂彎現身，外母一見女婿時即送上擁抱，再親手將女兒交給焯皓。之後新人逐一向長輩敬茶，包括梁佩瑚夫婦、辛尉胞姐戴蘊慧等。儀式後，新娘收到6對龍鳳鈪及大金鏈等，行頭十足。

至於晚上的婚宴，辛尉換上婚紗襯鑽石，拖實老公受訪，更大方咀嘴晒恩愛，她說：「算係老夫老妻，其實結婚係隨緣，我哋20年嚟冇渴求呢日，婚前婚後一樣開心，不過結婚係想生小朋友，年紀大，婚後會努力，上天畀會開心，冇都唔介意。」焯皓則透露愛的宣言是唱《分分鐘需要你》。提到早上撞車，他豁達說：「我哋都預咗，因為今年驛馬星動。」

梁焯滿險錯過婚禮

梁佩瑚表示送傢俬及金器作禮物，指一對新人是多世的姻緣，傳授二人夫妻相處之道是需要冷靜，因辛尉個性和她一樣率直，故常常在群組叫他們冷靜。而以往稱焯皓是弟弟的焯滿，在婚宴上重申：「其實焯皓係我阿哥，只係家姐講錯咗，其實我先係佢細佬。」又指因航班問題，險錯過哥哥的婚禮。