韓團Big Bang成員T.O.P的舊愛韓瑞希，兩個月前認戀同性密友鄭多恩，還不時晒咀相放閃。前晚她卻大爆被對方家暴，遭捏頸恐嚇要親手殺死她，之後再展示腫到變形的手指照，死撐冇大礙，網民擔心她會步自殺身亡的好友具荷拉後塵！
曾與舊愛T.O.P一起吸大麻被判緩刑的韓瑞希，今年10月突然宣布出櫃，自爆與同性密友鄭多恩拍拖，更頻晒合照放閃！前晚，她突然在Instagram公開與友人的對話截圖，疑似求救：「姐姐，鄭多恩想殺我，點算好？我喊住講對唔住，但佢開始有啲唔正常，我只係覺得好辛苦話想死，想佢救救我，但佢將我壓喺地上叉我頸，鬧我係臭八婆，又話要親手殺死我！」友人非常擔心，勸她去醫院及與鄭多恩分手。
未知是否被鄭多恩施壓，韓瑞希上傳的截圖僅一分鐘便秒刪，但已被網民瘋傳。她又留言指首次被打得這麼嚴重，暗示慣常遭家暴，翌日再展示手指及手臂有明顯瘀傷的照片，卻死撐冇大礙：「唔係乜嘢大件事，我有用手掩面，所以塊面冇乜事，只係頭同頸有啲痛，我好堅強，唔使擔心！」但有網民發現鄭多恩早有暴力傾向，2012年與前女友分手時，曾用暴力恐嚇對方。
與韓瑞希十分老友的具荷拉，生前同樣被舊愛毆打並以性愛片威脅，於11月自殺身亡，不少網民擔心韓瑞希會步好友後塵踏不歸路，紛紛促她報警。
其實鄭多恩個底向來唔好，曾因吸食冰毒被判監年半，早前曾公開向合作過節目的元虎追債不果，遂大爆對方曾因盜竊被判入男童院，最終元虎被迫退出男團Monsta X。