李嘉欣讚囝囝有潛質從商
「大美人」李嘉欣與老公許晉亨及仔仔許建彤（Jayden）前晚出席聖誕音樂會，一家三口影相時，囝囝對鏡頭完全不怕陌生，被指有潛質做星二代，但嘉欣卻不認同：「佢有潛質做生意。（想佢從商？）想佢做佢鍾意嘅事，但佢仲細未知想做咩。」
早前嘉欣嫁後首度復出拍攝內地節目《演技派》，透露雖然只拍四日，但做足八日工作：「嗰幾日冇咩點瞓，好緊密要通宵拍，瞓咗六個鐘！（本身係咪因為拍四日先接？會唔會覺得畀人賣豬仔？）唔知呢？佢哋好專業嘅。」對於有傳酬勞五千萬，她說：「誇張咗，但滿意，今次係一個好好嘅經驗，第日有好嘅劇本都可以考慮吓。」