袁偉豪唔使備案女友日日監場

袁偉豪與黃智雯自爆有身體接觸的場面，坦言唔怕女友張寶兒呷醋！

藝人袁偉豪（Ben）、黃智雯（Mandy）、錢嘉樂、蝦頭（楊詩敏）、袁富華、羅冠蘭與康華等，昨日為明年1月公演的舞台劇《今晚打老虎》綵排，上演一場群戲。Mandy透露有一幕與Ben在閨房又唱又跳，有很多身體接觸：「記得拍《三個女人一個「因」》時同佢跳過少少辣身舞，所以唔擔心今次有身體接觸。」Ben卻笑言：「呢啲身體接觸我又冇乜所謂，我應該講聲多謝添！益晒啲老友。（同女友張寶兒備案？）唔使啦！可能佢日日坐到最遠個角落監場。」

錢嘉樂望囡囡捧場

既然有身體接觸，Mandy叫Ben晒肌益街坊：「你拍《使徒行者3》Train咗啲肌肉，唔好吝嗇！」對方卻笑言「Show你個頭」，她即反擊：「舞台上咩都有可能發生，你打定底。」Ben鬥嘴說：「你小心啲！」講到演出舞台劇，Mandy表示表演場地比錄影廠大，發揮上要調節：「要最後個行嘅人都Feel到。」Ben亦指有一定難處：「獨腳戲唔記得對白要靠自己兜，同埋每次出場前都會緊張，會想去廁所。」

袁偉豪、黃智雯與袁富華等綵排舞台劇，做足功課。

錢嘉樂不時爆肚，與蝦頭爆笑彈。

至於嘉樂受訪時獲蝦頭讚幽默，氹得女仔好歡喜，問到排戲可有爆肚？他笑言不停爆：「我想搵劇本可以點樣好玩啲，但羅冠蘭唔想爆肚，同佢排戲時佢叫我好爆晒佢，Mark低晒我啲爆肚位，正式就唔好再嚟。」問到老婆湯盈盈與囡囡可會捧場？他笑說：「佢哋夠膽唔嚟？我想囡囡嚟睇，難得爸爸做舞台劇，我睇大女喺學校唱歌，希望佢支持番爸爸，係幾好嘅親子活動。」