C君文言文宣愛眼濕濕做老襯

C君終於娶得曾單戀多年的女友黃天頤，恭喜晒！

組合農夫成員C君昨日迎娶拍拖5年的電台DJ黃天頤，前晚凌晨各自在酒店上頭，昨日中午時分C君與伴郎陸永、大妗姐唐詩詠及一眾星級兄弟團包括蕭正楠、黃翠如、洪永城等到酒店接新娘。姊妹叫價九千九百九十萬的開門利是，最後C君以一封銀紙包紙巾的「開心大利是」順利過關。之後他接受三個遊戲考驗，包括穿美少女戰士服飾、戴眼罩口含唇膏為兄弟塗唇膏，以及睡在地上被含威化餅做掌上壓的兄弟噴到成面餅碎！到愛的宣言環節，他更一改傳統，讀出夾雜文言文的誓言，令房內的新娘子感動又開心。

單戀十幾年

新人於下午進行簽字註冊儀式，天頤右手戴上成卡閃爆求婚戒指，禮成後兩人肉緊情深一吻。晚上筵開21席，場內設計以紫色為主，背景是一龍一鳳及幸福二字的刺繡。婚宴前新人會見傳媒，怕醜地應要求錫了兩次，並大晒婚戒。C君表示整個婚禮很順利，講到愛的宣言是文言文，笑言以搞笑為主：「見到太太行入嚟嗰刻，感動到眼濕濕。」對於陸永踢爆他20年前已暗戀太太，C君笑言是「明戀」：「我單戀咗我老婆十幾年，最終都可以拍到拖，梗係想開花結果！」問到是否從來沒吵架？天頤說：「籌備婚事冇嗌過交，但平時就有。」講到陸永指他倆相處像老夫老妻，C君說：「佢對住任何人都老夫老妻o架啦，佢未拍拖就結婚生仔。」天頤又爆料：「陸永之前嘅女朋友都唔會長過兩年，依家真係脫胎換骨。」C君又笑陸永冇擺過酒冇資格評論他：「即係冇測試過愛情，好敬佩啲人擺酒，原來係咁攰。」

C君接新娘，星級陣容夠晒勁。	蕭正楠含餅做掌上壓，搞到C君成面餅碎。	蕭正楠、洪永城咀嘴，好彩有塊膠片隔住！
初次擔任大妗姐的唐詩詠，一味喊驚。	新人咀嘴	謝安琪讚C君文筆好，令他變靚仔。

• 陸永恭迎鄭裕玲，她恭喜C君時說：「都唔知新娘子鍾意佢邊忽！」

大妗姐詩詠嘆難撈

唐詩詠做大妗姐，要背吉利說話大呻難做：「啲說話難背過拍劇台詞，最驚講錯親戚名，啲字又要押韻，啲兄弟又唔易服侍，所以好驚。」一身紅噹噹的她，被陸永取笑與新奶奶撞衫，詩詠笑言：「奶奶先係最靚，好驚變咗奶奶，晚上即刻換咗西裝黑裙造型。」