李思欣生腎石體會十級痛
藝人范振鋒與李思欣於2011年拉埋天窗，婚後非常恩愛，日前更夫妻檔拍住上郵輪搵真銀，豈料工作期間，思欣右腰後方突然劇痛，頂硬上捱到前晚落船即到醫院睇急症。
前晚其實亦是兩人結婚8周年的大日子，本來打算好好慶祝，最終竟要在醫院度過「銅婚」，思欣在社交網「紀念」，上載兩夫妻十指緊扣的照片並留言：「估唔到結婚8周年會喺醫院過……辛苦你了 #陪伴是最好的禮物」，大批網友及朋友留言慰問。
多飲水助排石
思欣昨日接受本報電話訪問，透露昨晨進行檢查後，醫生告知她兩邊腎都有腎石，幸而體積不算大：「醫生話要飲多啲水，唔可以令腎石再大或再多。其實可以做手術令粒石更細，但我選擇飲水，希望有機會排番啲石出嚟。」
問到腎石不算大，為何會引致劇痛？她解釋：「醫生話有機會粒石咁啱走咗入輸尿管，咁就會痛到生仔咁。我有問醫生第日會唔會都係咁，佢話有機會，依家飲水紓緩番先。」又笑言現時要狂飲水，但不敢挑戰凍飲。
