最想代言衞生巾 唐詩詠晒肩捽泡尷尬吸金
藝人唐詩詠之前於新加坡奪得視后獎項，頓時人氣急升，更吸引不少廣告商垂青，詩詠日前罕有露肩、露背拍攝沐浴露廣告，笑言渴望拍多一次衞生巾廣告呢！
「星洲視后」唐詩詠於馬來西亞甚受歡迎，得獎後的她繼續吸人氣、吸金，日前為沐浴露品牌拍攝電視廣告，亦於馬來西亞舉行了一個大型記者會，獲不少熱情粉絲舉牌撐場，場面熱鬧。今次是詩詠首次拍攝要露肩邊捽泡泡邊洗澡的沐浴露廣告，見她狀甚舒服，笑容甜美，但她坦言拍攝時有些尷尬。
當眾「沖涼」
詩詠說：「啲工作人員對我好好，拍攝當日有好多食物預備畀我，等我有足夠精神，因為原來拍沖涼好攰o架！一啲都唔容易，平時拍戲角色要沖涼就冇乜尷尬，但嗰日要對住一班人時，雖然只係扮沖涼，但會覺得有少少尷尬，不過係幾得意嘅！」
詩詠入行以來拍過不少廣告，問到有甚麼廣告最想拍？她笑說：「其實我人生第一次拍嘅係衞生巾廣告，當時喺街被星探發掘搵我拍。如果問我依家有乜廣告想拍，我都係想拍番衞生巾廣告囉！哈哈！」笑問她是否想做代言人有免費待遇時，她即笑說：「冇錯！衞生巾如果有免費嘅話就好喇！」