薛家燕哀傷落淚：佢好錫我！
薛家燕昨日錄影黎小田（Michael）特輯時談及故友，大嘆對方走了之後，一直很難過，更憶述上年Michael只向她表示很攰，不想做節目，未知是否為免她擔心而隱瞞病情，指好友「好錫我」，不禁哀傷落淚！
資深音樂人黎小田病逝，無綫昨晚錄影特輯《創造經典：永遠懷念音樂巨匠黎小田》作紀念，好友薛家燕、柳影虹、伍衞國等出席。現場放有一本名冊，給嘉賓寫下給Michael最後的說話，薛家燕寫上：「Dear Michael，你是我的心肝寶貝，Love Nancy家燕。」
手同身成日好凍
受訪時薛家燕難掩哀傷，不時哭泣，坦言好友辭世後，一直難過至今：「可能一下子接受唔到，多謝佢答應咗我同我做《流行經典50年》，舊年佢同我講有啲攰，唔舒服想唔做，我叫佢唔好，跟住佢望住我話：『你話點就點』。諗番當時，佢係咪已經身體唔舒服但冇同我講？（你幾時知佢有病？）4月份佢話心口有啲唔舒服，隻手同個身會凍，成日拖住我隻手話凍，我仲同佢講笑話我着低胸都唔凍啦！問佢係咪其實想拖我隻手，佢又冇出聲。唉，諗番真係好難過，佢真係好錫我。」
關菊英「蒲頭」
柳影虹表示為了尊重Michael沒有前往探望：「依家唔使受苦、捱日子，我父母、細佬都係癌病去世，我最清楚嗰種恐怖，可以幾日就冇。（遺傳？）我都好驚，有做檢查，但Check唔到咁多，唔通日日去醫院Check住咩！」由美國趕返出席錄影的蔡一傑，表示與Michael相識30年：「我師傅係梅艷芳，佢又係阿梅恩師，所以當年登台，Michael有一齊去，佢份人好為食，大家好鍾意一齊跟佢搵食。」
Michael前妻關菊英之前被傳健康有問題，黎小田死後一直沒露面，昨日卻在李司棋社交網「蒲頭」，跟《溏心風暴》藝人敍舊，只見她精神、面色都很好，相信身體沒大礙。