岑杏賢落閘派檸檬冧認有人追

無綫藝人岑杏賢(Jennifer)與袁偉豪分手約3年,男方屢傳明年與張寶兒拉埋天窗,至於Jennifer近月終破Dry成功,31歲的她被指與28歲藝人焦浩軒撻着,大玩「姊弟戀」!

約埋收工

憑處境劇《愛.回家之開心速遞》角色「阿壯」彈出的焦浩軒,最近與Jennifer合作主持節目《流行都市》,由於二人均「浸過鹹水」同聲同氣,加上日對夜對而日久生情。

有指二人9月時撻着,早前他們拍《都》時玩直播,當談到「約埋收工」話題時,焦浩軒懶理其他主持,摸Jennifer面頰,並說:「我哋會約埋o架!」同是10月生日的二人,據知早前拍外景後,齊齊與工作人員慶祝,期間安德尊祝二人「百年好合、永結同心」,Jennifer更向焦浩軒獻吻!

日前Jennifer現身銅鑼灣,問到是否與焦浩軒拍拖?她愕然說:「梗係唔係啦!點解咁傳?」提到男方摸她面頰,她說:「咁搞笑?(安德尊祝你哋百年好合。)講笑之嘛,大家唔好咁認真啦!(真係冇拍拖?)同事嚟咋!」但問到有否追求者,她即甜笑說:「依家有人追,但唔係焦浩軒,哈哈!(發展中?)了解中,圈外人嚟嘅!」