張振朗首嘗慶功飯：算係「破地獄」
藝人張振朗、吳岱融與何雁詩等昨晚出席無綫劇集《牛下女高音》祝捷晚宴，該劇大結局七日跨平台總收視達30.7點，觀眾人數有二百多萬，成為2019年8時半時段劇集單集收視之冠！張振朗早前因台慶綵排而弄傷膊頭，他表示現時發力要「就住就住」，本來要為下部劇《踩過界II》做Gym操Fit，現時惟有先做腳部訓練：「好在唔係打中個頭，否則可能毀容。」又指今年已還了兩次神，發覺所有意外都從天而降，所以對高空都特別小心。講到收視報捷，入行八年的他笑言好像是首次食慶功飯：「算係『破地獄』！」
何雁詩再搵個「男友」
至於吳岱融坦言離開無綫已一段長時間，今次仍能獲觀眾支持感開心，問到會否拍續集，他指未聽聞有此計劃，一切等監製決定，講到獎項則笑說：「之前諗有獎攞梗係好，但喺街見到啲觀眾反應咁好，其實仲開心過攞獎！正如馬國明都講，廣告商搵你都要鍾意你先得，所以最緊要觀眾鍾意，呢啲先實際。」而約滿星夢的何雁詩表示今次純粹事業上原因，希望有更出色發展及可以表達音樂上的意見，正物色公司的她坦言唔心急：「好似搵男朋友咁，要搵個啱自己嘅！」
