黎瑞恩澳門騷擔心甩裙打定底！
歌手黎瑞恩（小恩子）上周六在澳門舉行演唱會，向來性格開朗的小恩子，將快樂感恩及正能量傳給歌迷。望見台下一片燈海，她不禁感動高呼：「唔好搞喊我！」
小恩子到澳門開騷，吸引不少圈中好友捧場，包括好友馬浚偉、周汶錡及父母、黎諾懿與太太、劉小慧、何婉盈及林韋辰等。原來6年前的11月30日，正是小恩子在香港紅館開騷的日子，6年後身在澳門舉行個唱，對她來說別具意義。她為了今次個唱全新打造服飾、舞台及燈光，與去年的紅館個唱截然不同，又特別選唱當年參加唱歌比賽奪冠的歌曲《夜機》開場，以Pink Lady造型登場。
戰衣五顏六色
全晚換了5個造型的小恩子笑說：「件件都鍾意！今次特登要服裝五顏六色，千祈唔好淨係黑色，或者只得一種顏色！」有高貴造型，亦不乏性感一面，其中以黃色低胸傘裙最有睇頭，她笑說：「我都覺得唔好再咁低，因為好似好危險！有時候唱唱吓就諗，會唔會踩到啲紗，成條裙甩落嚟，但又覺得演唱會要試吓着呢啲裙。所以，我有打底着咗一件衫，有咩事都唔怕！」她唱出《雲上的日子》時，台下歌迷即亮起手機燈打造燈海，小恩子感動落淚，大呼：「唔好搞喊我！」
夢想傳播快樂
Encore前最後一首歌，小恩子問觀眾有何夢想？全場即大聲答「一人有一個夢想」，她說：「我嘅夢想就係幫助啲有需要嘅朋友，好似馬浚偉咁（做善事）。我覺得快樂好簡單，諗嘢簡單啲，幫多啲人，就已經好快樂！」馬浚偉即大讚：「你好靚呀！」她不禁笑說：「一陣畀50蚊你，哈哈！」