《唐山大兄》成絕唱 「粵曲王子」鄭錦昌病逝

鄭錦昌的《唐山大兄》當年唱到街知巷聞，兩年前他在港舉行告別演唱會，一直有腎病的他近年身體欠佳，瘦了一圈，最後一次公開露面是今年9月在馬國出席賀歲片《大財神》開鏡禮，本來他獲邀演出，但以健康為由婉拒，不過特意現身撐場。據知他的喪禮今日在馬來西亞設靈，下周一出殯。

病重行唔到

有指鄭錦昌因為糖尿病，每星期都要洗兩次腎，但後期已經嚴重到行不到路，但他不想朋友擔心，所以無人知情。為人正面的他早就為家人生活安排妥善，去年與一班老朋友在馬來西亞搞演唱會，他還在台上對大家送上祝福。早年他來港舉行告別騷前受訪，暢談過着半退休的生活：「開完演唱會就正式告別，但唔係封咪，日後有需要用到我都會唱。」對舞台依依不捨的他十年前在馬國郊區買了農地，本想退休後回歸田園：「諗住退休去種菜、養雞，不過因為地方太偏，啲朋友話治安唔好，驚我有事冇人理，所以打消念頭。」

放大圖片	譚炳文與徐小鳳對鄭錦昌逝世，大感可惜。

譚炳文讚有風格

與鄭錦昌屬深交的譚炳文對老友病逝感到好可惜，他說：「佢77歲都好後生啫！我都八十幾啦，不過病就冇辦法，我知佢個腎有事。」鄭錦昌曾翻唱他不少歌，他大讚對方好有風格：「以前我去吉隆坡登台，佢成日招呼我，早年佢喺香港開演唱會，我哋都有同台合唱過，之後佢都嚟過香港兩次，我都有搵佢敍舊，仲記得同佢去鯉魚門食海鮮，當時佢都好瘦，不過精神就唔錯。」

殿堂級歌后徐小鳳曾經與鄭錦昌在同一間夜總會共事，對其病逝感到突然，她難過地說：「佢好熱心幫人，好似有啲外地歌星去到佢好熟悉嘅地方，佢都會有照應。」曾經為鄭錦昌告別騷做過嘉賓的馮素波也知道他身體欠佳：「知佢有病唔係咁好，既然咁辛苦撐落去，安詳咁走都係一種福氣。」而薛家燕早就聽聞他身體不好，曾經想邀對方亮相《流行經典五十年》，但他身體不適沒有答應：「係好可惜，年紀大就多病痛。」