古天祥慰妻 做貼身膏藥送肉嘴
早前加盟邵氏的藝人古天祥（Carlos），今年9月與拍拖年半的圈外女友周琬瑜（Cat）拉埋天窗。日前兩人現身中環，只見Cat肚凸凸，Carlos化身「貼身膏藥」全程攙扶，二人結婚不足兩個月已雙喜臨門，難怪忙於拍攝賺錢的Carlos，亦要抽空「慰妻」!
近日和陳自瑤合演無綫新劇《大步走》的古天祥，今年8月被本報發現他入紙跟任職醫療集團經理的圈外女友周琬瑜結婚，9月在陽明山莊擺酒大宴親朋。日前下午，夫婦倆現身中環街頭，見Cat肚凸凸，行上斜路及過馬路時，Carlos化身「人肉扶手」讓太太扶着，又摸着太太肚皮行路，緊張護駕，免她被途人撞到。
互餵甜蜜蜜
之後，他們到餐廳醫肚，上電梯時情不自禁連環攬錫！點餐後他們互餵又抹嘴，認真煙韌。食飽飽後，兩人轉戰BB用品店，細心挑選孭帶、BB車等，「準爹哋」Carlos試戴孭帶，Cat細心幫老公整理，又為這個實習爸爸拍照留念，Carlos即送「肉嘴」獎勵太太，恩愛滿瀉。
一索得男好感恩
Carlos受訪時承認太太懷孕，指籌備婚禮期間造人成功，一索得男，太太已懷孕8個月：「今年1月底成功求婚後，好多朋友叫我哋快啲生，因為唔係想要就有，好多人都要試幾年。考慮咗幾個月後，我哋商量過就開始嘗試，最終喺上天嘅祝福下，好快就有咗小天使。好彩太太懷孕期間冇咩不適，又冇嘔，真係好感恩。預產期係下月底，我已經請定假，會陪佢入產房。」問到將為人父，感覺如何？他直認心情非常複雜：「成日覺得好多嘢不足，包括物質同知識上，同埋因為工作唔穩定，擔心如果我要出差做嘢，太太自己一個點算，所以好大壓力，但佢反而叫我放鬆啲！」