余德丞執番條命量力而為 定期體檢

無綫藝員余德丞前晚在將軍澳電視城拍攝節目《娛樂大家》，對於台星高以翔拍攝內地節目時猝死，去年踢波突然昏迷、心臟一度停頓的他說：「今朝講波講到6點，之後收到好多朋友嘅訊息講呢件事，係好可惜。（勾起你嘅回憶？）我真係好好彩，可以醒番。（依家身體點？）相當好，已經返去以前嗰個生活模式同節奏。希望大家量力而為，唔好恃住後生，唔好為工作搏到盡。」並透露已經再踢波及健身，但不會像以前般劇烈，並奉勸大家要定期做體檢。