韓馬利大病後抑鬱反應慢
由蘇志威創立的舞蹈演藝學院，昨日為最新舞蹈證書課程宣傳，擔任學院董事、早前自爆患腦膜炎的韓馬利首次公開現身，回復狀態、精神不俗的她大派定心丸指身體好好多。
講到病發經過，她表示發燒2日，睇醫生期間突然「斷片」陷入昏迷，曾一度危險到猶如半隻腳踩入鬼門關，個幾星期全無意識，嚇壞老公：「結婚30幾年都冇見過佢咁驚，吊咗3個星期消炎藥，搞到散晒冇力、出晒冷汗，後期仲有抑鬱，所以要食半年血清素，因為驚翻發，中醫就係調理。」又指大病過後反應變慢，體重亦大跌7kg：「當時食唔到好無奈、好辛苦、好慘，經過今次病之後，學識享受慢活生活，覺得每日擘大到眼唔係必然，食到嘢、抖到氣都好感恩。」