衛詩雅𢱑送禮家樂守財側側膊

藝人陳家樂、衛詩雅及前無綫新聞主播陳嘉倩昨日出席品牌頒獎禮，問到現時社會情況可有影響工作？詩雅說：「本身應該開緊工，工作排到下年年頭，但依家就停咗，未知延期到幾時。（幾多套戲受影響？）三套，依家一直延期。」家樂亦表示有兩套電影延期，他就趁機報讀演技班增值：「我跟林立三學演戲，尋日上第一堂，同公司新人一齊上，真係大開眼界，扭轉之前演戲方法，要重新適應。」

嫌學費貴想旁聽

問到詩雅可有乘機增值？她笑言本身想一起學，但太貴：「冇家樂咁有錢，所以叫佢學完話我知學咩。」家樂即踢爆：「佢仲話諗住去觀堂，想唔使錢上堂，好衰格！」詩雅笑言：「我仲叫佢一定要take notes畀我。」問到收入可受影響？詩雅表示：「有。（有冇影響供樓？）還好，因為我層樓唔貴，依家仲供緊，會繼續努力。」

生日願望有工作

詩雅於24號將35歲生日，叫家樂可以在活動上揀禮物給她：「陳家樂成日粗心大意，今日呢度好多品牌，好多嘢揀。」家樂即時反駁：「我唔係粗心大意，係守財……係節儉先啱，同埋佢都冇送過禮物畀我。」說到生日願望，詩雅希望開心和有工開。