孔德賢後生上位忙到冇朋友
現年22歲的孔德賢（Danny）貌似羅仲謙，憑主持無綫節目《#後生仔偈吓傾》而廣為人識。他於大學修讀建築工程，過去兩年兼顧學業及幕前工作，今年終於畢業。他放棄做專業人士，全身投入娛樂圈，笑言是為了「青春」：「其實之前冇特別諗入行，係朋友話我知有個《後生仔》節目，我去咗試鏡，就係咁邊讀邊拍。點解唔做工程師？因為做工程師到退休都係工程師，但做娛樂圈冇咁單調，可以做到唔同角色，就算條路唔順都可以再嚟過。」
唔怕招人妒忌
提到他有份拍攝節目《12個夏天》、《勁歌金曲》及《台灣原味道》等，工作量之多，是同期「後生仔」之冠，Danny坦言不擔心招人妒忌：「人同人之間會有比較，當自己有呢啲機會，唔囂張好緊要！佢哋都明白。有個高層同我講，叻嘅人唔會覺得自己叻，呢個心態好緊要。」有得必有失，他大呻冇時間與朋友見面：「好多時人哋約食飯，我去唔到，人哋叫多幾次就唔會再叫你。我做第一份兼職識嘅一班好好朋友，其中一個人求婚，佢叫成班出去都冇叫我，睇到佢喺社交網放相先知，唔知擺酒請唔請我呢？」
被人掟落垃圾桶
被喻為翻版羅仲謙的他，被問讀大學時是否萬人迷？他笑言：「唔會，自認都幾Cool，可能雙子座關係，癲嘅時候可以好癲。試過生日畀人掟落垃圾桶、倒豉油、掟雞蛋都冇嘢，但Cool嘅時候可以粒聲唔出。（被人誤會囂張？）有人覺得我扮型，熟我嘅就知唔係。」他坦言視林峯與周柏豪為偶像，問到可想成為大眾偶像？他說：「其實唔一定要做偶像，反而希望自己嘅言行對年輕人有正面影響，唔想佢哋行冤枉路。」
場地：Goshaku五勺