敖嘉年下月音樂劇或考慮延期
藝人敖嘉年最近除了拍攝無綫劇集《伙記辦大事》外，十二月將演出音樂劇《卿本佳人》，昨日他到電台接受訪問指音樂劇要獻唱不少50年代粵語片歌曲，最難是記歌詞，綵排時不時唱錯歌詞。問到可擔心音樂劇受社會氣氛影響有機會延期？他說：「社會氣氛都要面對，好似今朝過嚟做訪問都特登好早起身，過嚟又冇乜阻滯。任何情況都好，去到先至面對，未發生嘅情況就唔使緊張住。」問到可有應變措施？他說：「暫時未有決定，因為好多朋友買咗飛，當然安全第一，到時有問題再去考慮延期。」
早前他拍攝《伙》劇一場向李泳豪爆樽戲，不慎傷及對方額頭及鼻：「個樽係糖膠道具，但都有一定硬度，嗰吓如果唔一次過拍會仲痛，一扑落去，個樽打到佢個鼻，見到佢個頭又腫又流血，我真係唔敢行埋去，好唔好意思。」他坦言拍打人戲，打人的反而會有陰影，情願做被打的角色。