李佳芯未解凍放長假拍拖
李佳芯早前捲入政治風波傳遭無綫「雪藏」，昨日為節目擔任嘉賓終於「蒲頭」，她坦言未有新劇安排，準備去個悠長旅行及計劃進修，視后似乎仍未「解凍」。
李佳芯昨日與陳豪、蕭正楠、曹永廉等劇集《愛美麗狂想曲》演員到電視城擔任《Do姐有問題》嘉賓，李佳芯被問到是否已經「解凍」？她指上月才完劇：「唔係好耐冇見啫。由第一日話雪藏，都係睇報道。（工作少咗？）未聽到開新劇，出面個市都好靜。」又說趁有空與男友去短程旅行，也計劃自己去加拿大作長旅行，考慮讀演藝課程進修及學畫畫。
被飛走呻可惜
有傳她主演的劇集《殺手》戲份被刪，宣傳片也很少她出現？李佳芯指該劇多人拍，看過初期的宣傳片，自己不是好多戲，至於何時再拍劇則不知道：「不嬲好被動，突然間要你拍，冇嘅時候就充實自己。（《BB來了2》換咗岑麗香？）香香好有觀眾緣，可能有另一種效果，佢又啱啱生完BB，期待佢出番嚟。（《踩過界2》都冇份？）係有啲可惜，自己幾鍾意個角色。」
問到會否後悔作政治表態？李佳芯直言低估咗：「我唔係激進，純粹抒發個人感受，但喺敏感時間容易觸動到人嘅神經，公眾人物亦會被放大，呢個係睇番嘅感受，OK嘅、小心啲囉！我只係想做演員，唔想同其他嘢掛鈎，唔想畀政治蓋過工作。」而陳豪近期忙於打理咖啡店生意及湊仔，他指生意只略受影響，已經好幸運。
朱晨麗奉旨拍拖
同場的朱晨麗、洪永城為台慶劇《多功能演員》錄影，朱朱笑言雙方拍完劇後整年沒有見面及聯絡：「佢好似想同我劃清界線咁。（人哋有女朋友。）有女朋友就唔要個朋友囉！」她透露12月會與緋聞男友何廣沛拍攝旅遊節目，多謝公司畀機會。問到大可順便拍拖？她說：「去做嘢㗎！（何廣沛同你影泳衣相？）要啦，但係要進修吓，點樣影得瘦啲、條腿又長啲。」