婚禮搞掂一半倪晨曦聖誕又棄夫
「女神」倪晨曦預告聖誕節將撇甩未婚夫，與家人飛到美國玩，留下未婚夫在港籌備婚禮，但會預先與他食大餐及交換禮物。工作忙碌的她透露分散了時間籌備婚禮，幸好未婚夫沒有詐型！
藝人倪晨曦（Elva）昨日到Mira Place出席「DRESDEN X'MAS MARKET」亮燈儀式，獲聖誕老人送上手工花環作結婚禮物。她表示最愛聖誕節，但今年會撇甩未婚夫：「係臨時決定，佢都理解，因為屋企人臨時安排咗去美國旅行，我有請佢過去一齊玩，但佢想留喺香港籌備婚禮，同時陪吓屋企人、朋友，所以我哋會提早食餐飯、交換禮物。」
籌備開瑜伽Studio
明年2月舉行婚禮的Elva表示，婚禮籌備進度已一半，最麻煩是有很多瑣碎事：「例如Rundown、當日會用到嘅所有嘢，好多細節位，我哋冇搵Wedding Planner，所以全部我哋Plan。」12月她原本想多些時間留港，但因工作要周圍飛：「我都鍾意周圍飛，就算有啲辛苦、攰都唔介意。（未婚夫會唔會詐型，話你周圍飛唔搞婚禮？）因為進展好好，佢冇詐型同投訴。」婚後因為要工作，她表示暫不度蜜月：「做嘢先，冇特別Plan，之後再諗。」又透露現時籌備瑜伽Studio，預計明年1月開張：「所以好忙，分散咗籌備婚禮，不過嗰個係我好想做嘅嘢，我同朋友一齊夾份搞嘅，依家裝修緊。（咁忙仲有時間去旅行？）個Trip好短，因為要陪屋企人，難得有機會可以一齊玩。」