藝人吳（肇）軒昨日到中央圖書館出席活動，他表示自細就鍾意睇書，曾因角色遭遇太悲慘而在港鐵流下男兒淚，又自爆曾於網上討論區寫連載小說，但爛尾收場：「當時好有使命感要寫落去，但要考會考就冇再寫。（鹹故？）唔係，係搞笑嘅。（依家埋尾？）過晒氣啦！嗰時有諗過再寫，寫晒先出，不過寫到7、8成，部電話跌咗，可能連個天都唔想我出書。」
