Cheronna跑到嘔 Aka爆汗認樣衰
組合Super Girls成員Aka與Cheronna日前齊齊受訪，為下月24日舉行、抗愛滋工作籌款的慈善跑宣傳。二人找來教練拉筋熱身，為賽前作好準備。當日是Cheronna爆分手後首次見人，比之前消瘦不少，但心情不錯。她表示不回應感情事，只透露狀態很好：「好開心，依家專注工作。」她們表示首次一同參加慈善跑，覺得很有意義，並指很多小朋友在母體已感染愛滋病，希望活動可以引起更多人關注。
傷患纏身
二人表示將跑10K，除了改善夜睡習慣外，亦要調理身體，Cheronna自爆頸椎移位：「影響右邊半邊膊頭同手痹咗，係兩、三個星期前發生，突然間覺得痛，因為之前身體唔好，好少飲水，又唔夠瞓，身體水分抽乾，肌肉就掹得好緊，掹到條頸再歪啲，同埋本身已經歪，所以希望比賽前醫好。」她坦言自中學拗柴後，右邊身開始出現很多問題。Aka則右腳患筋膜炎：「踩落去好似係有千絲萬縷嘅神經擴散喺隻腳，好痹！物理治療師會搵啲嘢『銳』落去，痛到我大嗌。」
食飽出事
她們表示喜歡跑街，Aka笑言試過跑到成身汗被人認出：「佢想影相，雖然我樣衰到嘔，但因為夜晚光線唔充足，所以都有影。」又分享跑步瘀事：「有次跑步，朝早食咗個麵，喺肚裏面『𠺘吓𠺘吓』，搞到橫膈膜痛，所以要掩住跑，但有個人喺後面用大聲公話『前面嘅放慢腳步，保持呼吸』，我諗住大家唔知係我，就繼續跑，點知後尾佢架單車踩喺我隔籬，對住我話『保持呼吸』，搞到好多人望住我，下次我唔會食到咁飽。」而Cheronna笑言中學時試過跑步前吃了麵包：「之後原舊嘔番出嚟，真係好辛苦。」
場地：adidas