汪明荃代言31年耐過翁嘉穗結婚
汪明荃（阿姐）昨日到西貢，以海馬牌代言人身份拍攝新一輯廣告，海馬集團主席鄔友正與太太翁嘉穗到場支持，阿姐笑言：「鄔生，今年31年喇，耐過你老婆呀，幾長情。」問到如此長情，是否年年加人工？她說：「少少啦，今次拍多一條新嘅廣告片，希望打開馬來西亞市場。（有冇傾同老公羅家英一齊拍？）暫時未，諗吓先，佢都好多廣告。」
永不言休的阿姐，早前完成西九粵劇演出，近日又到新加坡工作，問到可會去旅行休息？她笑言：「又去旅行？有工開好難得，年紀再大啲就做唔到，下星期要錄影《娛樂大家》，月尾就喺新光做三日《帝女花》。」
否認「Big Boss」
至於翁嘉穗笑言：「我選港姐時，都係阿姐做評判，嗰陣佢已經代言緊海馬。（你唔做生招牌？）梗係唔可以同阿姐爭啦，佢嘅地位好穩固。」提到近期市道差，她指公司生意穩定，現主力拓展馬國市場：「我哋品牌喺新加坡係銷量冠軍，馬來西亞做咗幾年，亦愈嚟愈好，嗰邊好多華人鍾意講廣東話，《金宵大廈》佢哋都有睇，我哋都有啲合作喺劇裏面，之前有新聞話阿姐先係Big Boss，哈哈！」擔任慧妍雅集主席的她，正修讀藝術課程，又要為公司篩選產品，相當忙碌，記者笑她才是公司真正的Big Boss，她笑言：「唔係，只係畀吓意見。」