宣萱Warm爆融化古天樂

古天樂與宣萱的緣分，始於1994年合作無綫處境劇《餐餐有宋家》，隨着18年前劇集《尋秦記》煞科，便沒有在幕前合作，直至早前宣萱簽約男方旗下，合演新片《犯罪現場》再聚首。二人於片中關係曖昧，扮演重犯的古仔離世後，將眼角膜捐贈給弱視的宣萱，遺「愛」人間。

碌地怕蟻咬

相隔多年再合作，宣萱笑言與古仔依然有默契，訪問期間互窒，「Mr.Cool」面上罕露會心微笑，他說：「我個角色嚴重失眠同出現幻視，租住宣萱屋企後先有避風港，壓力得以紓緩。」戲裏戲外，宣萱的樂天感染了古仔，成為他的「安樂窩」。

戲中古仔雖然犯罪，但卻不容「被屈」，花盡心力為兄弟「尋求公義」，他說：「我嘅角色幫兄弟緊要過生命。（同你本身好似？）應該話事有緩急輕重，邊樣緊要就做邊樣先。」又指拍煞科戲印象難忘：「拍之前嗰幾日黑雨，發現咗好多紅螞蟻，我仲要碌地，又擔心咬到工作人員，每次埋位都要用火烘一烘。」

推拍檔做壞人

問宣萱現實中會否捐贈器官？她說：「18歲嗰年我喺英國考車牌，當時夾住器官捐贈回條，我爽快咁簽咗。可能呢樣嘢係中國人大忌，覺得要留全屍，但我覺得唔會劏開我就算，一定會縫合。」再問日後想演甚麼角色？古仔搶答：「佢好少演反派，畀個壞人佢演吓囉。」宣萱即說：「係呀，我最多演過大婆，畀氣二奶受咋！」