劉永第三段婚姻玩完賣樓分產

現年68歲的藝人劉永，於2007年再娶細他30歲的內地女子黃麗燕，婚後育有兩子，但12年的夫妻關係，最近離婚收場。劉永昨日受訪時表示，與「前妻」因感情問題分居，卻未有簽字，原因是不想太高調傷害兩名分別12歲及8歲兒子的弱小心靈。

返港住700呎村屋

劉永在邵氏拍戲紅爆中、港兩地，至80年代加盟亞視，憑劇集《秦始皇》再度走紅，他之前兩段婚姻雖然失敗，但到內地發展的他，雖然當時已近六旬，仍娶得「嫩妻」黃麗燕，惟第三段婚姻僅維持12年，今年初夫婦倆開始出現問題，年中已分開生活，最近劉永更不惜將內地中山的單位賣掉，將一半樓價約幾百萬港元給黃麗燕，以換取兩子的撫養權，而他則返港生活，方便照顧在港讀書的兩個兒子，目前租住上水一間700多呎村屋，準備與兩子在港重新生活。

近年染指幕後的劉永，除在深圳有影藝公司外，亦有演出網絡電影，生活不成問題，笑言為養仔會努力奮鬥。問到與黃麗燕是否已辦妥離婚？劉永昨日接受電話訪問時表示尚未簽字：「我哋之間感情上唔開心咪分開住囉。（有第三者？）我唔知佢啲嘢，佢做乜我都唔知。（已經離咗婚？）佢係我前妻，但未簽字，因為我唔想登晒報咁，畀個仔知道會傷害到佢哋，唔想佢哋有負面想法，反正啲仔大大吓都會知o架啦！（囝囝唔會搵媽媽咩？）唔會喎，兩個仔都好跟我。（前妻唔會想見兩個仔？）佢唔會嚟香港嘅，佢有佢生活。（冇照顧囝囝？）佢從來唔入廚房，有工人嘛，日日只顧打麻雀，為呢啲事有同佢嘈過。（佢唔想要番囝囝？）佢只想要錢，佢都攞咗我一半啦！我賣咗層樓都分咗幾百萬畀佢，咁佢為我生咗兩個，都應得嘅！」

接仔放學唔想傾偈

劉永三度失婚，對「前妻」離他而去未有留戀，但卻很愛錫兩名兒子，昨日他親自駕駛七人車接仔放學，昨日傍晚5時左右，戴黑超的劉永駕車直駛入校園，幾分鐘後離開時，記者欲上前訪問，他停車校低車窗揮手婉拒說：「唔傾啦！唔傾啦！」然後絕塵而去，一對兒子則坐在後座位置。