Kay尾場有驚喜麥浚龍翻生對唱
謝安琪（Kay）的紅館個唱，因由「Kay場」變成Crossover麥浚龍（Juno）演唱會而惹粉絲負評，不過Juno沒如個唱短片中被「插死」，更「翻生」以壓軸嘉賓身份登場，跟Kay合唱新加的合唱歌《羅生門》，現場歡呼聲代替了之前網上不平聲，兩人成功突破常規。
Kay之前三場的個唱不設嘉賓，但前晚尾場最後環節卻爆驚喜，登場嘉賓正是疑將自己多首歌曲植入Kay騷上、令「Kay迷」不滿的個唱總監Juno。換上全新歌衫、將草帽反轉戴寓意人生不要墨守成規的Kay，在零介紹下靜靜地等待「彩蛋」出場，不再扮隱士的Juno甫現身，台下歌迷亢奮叫破喉嚨，兩人分別在舞台樓梯頂及底對唱《羅生門》，仍然沒有讀白及交談，唱完歌Juno拾級而上，跟Kay齊向歌迷鞠躬謝幕，有歌迷在散場後大嗌Encore拒離去。
除Juno外，台下嘉賓亦相當可觀，Kay老公張繼聰帶埋一對仔女捧場，還有以情侶Look現身的余德丞和緋聞女友蔡思貝、徐天佑和太太等。
跑斜路唱歌練氣
慶功宴上，被問到「齋唱」似王菲開騷的作風？Kay說：「可能唔講嘢係共通點，但我唔講嘢係有原因，呢啲係個別嘅觀感，冇為任何意見去刪改原著，除咗今日最後想畀個驚喜大家。」又透露為個唱每日跑步、打坐，強健體力：「我一緊張就會氣喘，個肺天生唔好，所以過往半年每日邊跑斜路邊唱歌，最初跑到胸腔好痛，唱唔到，反胃，到近期可以邊跑邊唱，呢啲方法應付到喺好緊張嘅情況下都可以唱歌，應付壓力方面都有成長。」
仔女捧場唔怕血腥
問到個唱中殺死Juno的短片可擔心嚇親仔女？Kay覺得他們接受能力高，亦指老公給她很多意見：「好似我頭先講嘅第四幅牆，佢解釋畀我聽，又或者個別環節嘅肢體動作都有畀意見。」