亞姐李芷菱誓要永恒上鏡
《2019亞洲小姐》香港賽區將於下月舉行決賽，意味着上屆亞姐快完成任務。2018亞姐「最上鏡小姐」李芷菱（Camilla）卸任在即，她坦言百感交集：「有少少唔捨得，卸任後公司就冇咁重視我，但同時又好開心有新同事加入我哋呢個大家庭。不過我對自己有信心，無論幾多屆都好，我依然會係最上鏡，哈哈！」
回想去年參選，Camilla純粹想參加訓練班吸取經驗：「喺街見到宣傳就去參加，當時主要為咗參加陳嘉容教嘅Catwalk班。」選亞姐是她人生一大里程碑，坦言當選後變化甚大：「性格上的確踏實同成熟咗，學到好多說話技巧，而且頂住最上鏡小姐呢個銜頭，講嘢要思前想後，唔可以亂講。工作上有更加多人認同自己，自信心提升咗。」
𢱑周潤發做戲
對於今屆候選亞姐被指質素參差，她認為「好戲在後頭」，更搞笑建議參賽佳麗注意形象：「最緊要笑容，同埋記得外出要化妝，因為有次我素顏去訓練，又着得好求其，去到先知有傳媒影相，嗰次真係黑歷史，所以形象好重要！」
她坦言對演戲最感興趣，希望能夠成為多元發展的藝人：「只要可以同發哥（周潤發）合作，有得近距離接觸，就算得一兩句對白都心滿意足。」