歌手周國賢（Endy）連月來變身拳手為電影《一秒拳王》拍攝，日前終於煞科，首度拍動作片的他打到周身瘀傷，於開拍前兩個月已開始特訓，每日做6、7小時Gym再練數小時拳，但在拍攝前不慎扭傷盆骨及背肩，最終要負傷開工：「有幾場打拳戲，都拍得好辛苦，痛到成個人攣埋，之後要去針灸先得。」
不過，Endy坦言拍得好享受：「係好辛苦，希望出嚟效果好啦，人一世、物一世，唔好係我唯一一部動作電影就得。」講到有場「終極之戰」與泰國男演員查農激戰，他表示：「佢有份拍《出貓特攻隊》，所以香港人會識佢，武師飛過去教佢拳，雖然佢唔係真正拳手，但好有天分，出拳好重，對打嗰幾場我都好大壓力。」