Bingo陳康琪打假波拆散鴛鴦
組合Bingo成員陳康琪（Odilia）化身「大波Odi」測試36D巨胸威力，微露「線」頭已迷到「恤衫男」現「Scanner眼」，激到同枱女友發火嗌分手！她又分享企廟街的經歷，15分鐘已吸引15個尋芳客問價，連身邊男同事都變得殷勤，大嘆男人身體最誠實。
Odilia日前拍攝短片測試豪乳的吸引力，身穿開胸貼身Tee，露出深長事業線的她在茶餐廳扮伙計，並進行向茶客攞電話、合照及約會三大任務，見她先向叔叔埋身，以和他同枱的小朋友影相及傳回相片為由，順利通過兩項測驗。之後再向一對情侶埋手，當她落單時，即被着恤衫男茶客的雙眼由頭掃到落腳，坐對面的女友當堂爆Seed寸男友：「你望咗好耐喇喎！即係人哋個胸大，你就要係咁望住佢，分手囉！」最後女友憤然獨自離去。
加墊A變D
昨日Odilia受訪被問到玩出火，她說：「我睇到個男仔咁望我，心諗個男仔有幾愛個女仔呀？不過個女仔都有返轉頭，冇分手。」又強調短片是真人騷，並非做戲，唯一假的是其巨胸，她直言「打假波」：「其實我上圍只得32A，但戴咗36D胸圍，內裏再攝四個墊先有咁嘅效果，不過個假胸都幾重，搞到條腰好攰。」
胸大有着數
變成「Double May」後，她承認有助異性緣：「平胸時啲男性朋友會當我兄弟，但變大波妹後，佢哋啲態度唔同晒，拍嘢啲Crew最現實，對我好咗好多。」又分享一次難忘經歷，有次在廟街企街拍片，只逗留15分鐘兼「零放電」，已吸引15個男人埋身問她「幾多錢？」可覺得難受？她說：「感覺好赤裸囉，不過離遠都有工作人員𥄫住，好安全，冇蝕底畀人。」