黎諾懿恨飲醉 黃智雯酒後打人

無綫藝員黎諾懿、黃智雯、吳業坤及姜麗文等,昨日在將軍澳電視城出席新劇《街坊財爺》「畢業典禮」。黎諾懿、黃智雯、馬國明及朱晨麗剛由新加坡回港,黃智雯爆回程時四人在機上把酒談心,傾足4粒鐘:「講吓啲八卦嘢,估唔到咁啱傾,我哋幾乎飲晒機艙啲酒,同朱晨麗都飲到醉醉地,好耐未試過傾得咁啱嘴形。」

她取笑黎諾懿「冇停口」,黎諾懿笑言:「我喺屋企唔係唔可以講嘢,係唔可以亂講嘢,個仔學得好快,我驚畀老婆鬧,屋企家規好嚴。我哋好似相逢恨晚咁,已經約咗大家去我屋企食飯,即係我老婆睇住就可以試吓醉,有佢睇住冇事。」黃智雯笑言:「驚飲醉會失控亂講嘢、打人。有次試過飲到醉醉地,同胡定欣喺度玩搏擊打MMA,再醉啲真係唔知會做乜。」