羅仲謙出口術「停工」搞喊張文慈

藝人羅仲謙、張文慈(Pinky)、張秀文及張曦雯等,最近忙於拍攝無綫新劇《木棘證人》。前晚開工時,謙仔到場向導演「攞人情」要求暫時停工,即場為昨日48歲生日的「家姐」Pinky舉行生日派對,當晚沒戲份的張秀文帶同蛋糕及禮物驚喜現身,令壽星女感動得眼濕濕!談到生日願望,Pinky說:「最緊要全組人拍攝順利,生日有工開是幸福的。」

韋家雄「出糧」瞞老婆

劇中Pinky與韋家雄演一對,獲通知稍後將拍咀戲,韋家雄笑說:「入咗公司咁耐,我終於『有糧出』,到時一定NG再NG!(唔畀太太嚟探班?)梗係唔好啦,我係做嘢喎!」問到謙仔與張曦雯劇中是否同樣修成正果?謙仔大賣關子:「已經有一對Happy Ending,我哋呢Pair留番啲遐想畀觀眾。拍到依家,我哋感情都未有突破,相信遲啲就會突飛猛進,快到即刻開續集!」而張秀文被問到與張景淳傳緋聞一事,她說:「我哋工作上有合作,登出嚟『撐枱腳』嘅相,實質係我哋開工喺職員餐廳食飯。今次係我認真首次拍劇,要好專注,依家心如止水。」

眾人前晚拍攝韋家雄及袁潔儀的墮樓戲,出動救護車及黑箱車做道具,袁潔儀因劇情需要滿身鮮血,切蛋糕時玩「失蹤」沒有大合照,她解釋:「我嚟現場時突然蕩失路,好似諸事不順,嚟到先知有人生日,今晚又拍我上黑箱車,我好急咁問劇組攞咗『死人利是』,好彩Pinky信教,百無禁忌!」