湯洛雯傳秘撻劉愷威：要睇緣分！

劉愷威去年底與內地女星楊冪宣布離婚，結束七年情，共同撫養女兒「小糯米」。由於女兒在港讀書，愷威化身「暖爸」經常帶着女兒出入，雖然要做「帶女洪郎」，但一樣無損其魅力，昨日有內地媒體爆出現年44歲的他，竟與32歲無綫小花湯洛雯（靚湯）「秘撻」四個月，還結伴遊英國！

澄清與友飯局非約會

據知兩人是在一個朋友聚會上認識，全靠靚湯的好友林夏薇做「紅娘」才得以發展，但劉愷威想將戀情保持低調，故薇薇亦幫手保密，借出其山頂豪宅予兩人密會，更借車載靚湯到深圳會合男友。內地傳媒向劉愷威方面求證：「假的，完全是編造。」其父親劉丹昨日亦同一口徑：「吹水！冇咁嘅事！」

至於「女主角」湯洛雯昨日出席新劇宣傳，親身否認戀情，又指未有與男方同遊英國：「大家只係普通朋友，亦唔覺得佢有意追我，我依家仲係單身！報道唔係事實，我哋唔係情侶關係。（有冇約會過？）冇！我哋都係一班人一齊食飯，有一班人嘅聯絡方法，冇私下傾偈。（一齊旅行？）冇，我同班朋友去咗英國同法國旅行，岑杏賢都有去。（接唔接受離過婚又有小朋友嘅男士？）要睇緣分，自己唔知將來會遇到啲咩人。（有冇機會發展？）冇諗，依家單身，要努力收身。」

湯洛雯	湯洛雯早前到英國旅行，劉愷威被指全程伴遊。	林夏薇與劉愷威老友鬼鬼，做「紅娘」都唔出奇。

舊愛羅天宇：恭喜佢

被指是「紅娘」的林夏薇昨日得知傳聞後大感愕然：「吓！咁莫名其妙，點解有咁嘅新聞？我唔喺香港，喺外地拍緊廣告，唔知發生咩事。（有指你做紅娘？）當然冇咁嘅事，唔係事實嘅嘢就冇回應。」講到舊愛被傳暗撻劉愷威，今日生日的羅天宇口窒窒說：「冇睇報道，如果係都會恭喜佢。（打畀佢求證？）如果係真，我諗佢都會講畀大家聽。（佢會同你慶祝？）睇吓有冇時間，約到都會食飯。」