陳健安簽名會掀炒風
歌手陳健安（On仔）昨日為新碟舉行攝影展，透露新碟成為近日銷量排行榜No.1：「粉絲群組不斷更新銷情。（加印？）冇特別問，公司準備咗40張畀我送畀朋友，本來有預埋屋企人，但佢哋問係咪出面買先計銷量，所以家姐、媽咪、阿哥佢哋去買咗好多隻，媽咪仲喺一間舖頭掃咗10幾張，掃到間舖斷咗市。」
談到下月7日舉行新碟簽名會，沒料100個名額竟於網上掀炒風，每張名額以$100兜售，On仔坦言不知情：「真係唔支持，但市場上就叫有市有價。（叫公司畀多啲名額？）等我出第二張專輯先要求增加名額。（會唔會搞音樂會？）我位置被動，有同粉絲講叫佢哋集氣囉！」