李麗珍讚囡囡揀男仔道行高

李麗珍大讚女兒許倚榕揀男友有眼光。

闊別公仔箱5年的李麗珍，最近「復出」拍攝ViuTV劇集《娛樂風雲》，飾演昔日影視當紅花旦，誕子後淡出娛樂圈，並經營二手衫事業。珍妹直認被輕鬆劇情及工時吸引，再加上就讀大學的女兒倚榕即將畢業，即答允演出，該劇暫定100集，若然添食又加薪，絕對無任歡迎。

學潮語冇代溝

劇中與多位年輕演員合作，珍妹坦言勾起入行時點滴：「佢哋勤力同醒目好多，以前返工諗收工，依家就個個都似身懷絕技，起碼準時呢樣最緊要。（有冇代溝？）初頭唔明佢哋啲潮語，依家學到啲，覺得年輕同開心咗。（用潮語同阿女溝通？）驚畀佢笑，佢覺得我講得唔似呢！」拍戲的一團火既然重新撻着，珍妹揚言稍後會影視雙線發展，填滿自己的時間，問到是否想填補感情上的空虛？她說：「好難答，暫時係咁，唔刻意諗感情，等天安排，但我係未Ready嘅。（因為之前段感情唔開心？）冇拉之前啲嘢去諗。」

許倚榕與年輕時的李麗珍相比，不遑多讓。	放大圖片	李麗珍、廖碧兒在新劇中合作冇隔膜。

燉湯洗碗管接送

珍妹17歲加入娛樂圈後已不停談戀愛，當中與潘源良的一段情更是糾纏多年，最終換來一次又一次身心受創，如今愛女墮入愛河，雖然也如她當年般愛得轟烈，珍妹笑言囡囡揀男仔眼光比她道行高，平日母女倆傾男仔經，亦了解女兒的男朋友，對他讚不絕口，指他倆打破異地戀界限，相戀幾年已步入穩定期，對方更懂得行「外母」政策，珍妹說：「佢會接機送機，有時佢媽咪燉嘢，又會整埋畀我哋，咁細個都識呢樣嘢。雖然冇煮過飯佢食，但佢見到啲碗碟又會主動去洗，真係唔錯！（兩家人見過面？）未咁快。（係囡囡嘅結婚對象？）個個女仔拍拖都覺得係結婚嘅啦！不過我都會分析畀佢聽，唔會點條黑路佢行嘅！」