陳庭欣怨男友想留番晚做其他嘢

陳庭欣笑言沒有股份，只幫男友打工。

前港姐冠軍陳庭欣以代言人兼女主人身份，昨日為男友楊振源投資千二萬於旺角開設的健身中心剪綵，好友朱晨麗、張名雅、馬德鐘、羅霖等撐場。Toby以運動bra top上陣，與男友打情罵俏示範boxing，Benny肉麻表示打完交會更愛女友。

計劃結婚

問Toby可有投資？她笑說：「我冇份，只係打工做代言人。」Benny即說：「我有份咪即係你有份！」Toby笑言：「但係我嘅錢都係我嘅錢喎。」問到何時結婚？Benny說：「我哋會努力，計劃緊，有消息再同大家講。」Toby則撒嬌說：「可能佢嘅計劃唔同我嘅計劃o架！」她又稱經常與男友一齊做運動，讚Benny比相識時大隻，但她投訴：「我哋依家成日都上嚟做運動拍拖，雖然我好鍾意運動，但可唔可以畀番一晚做其他嘢呢？好似睇戲過二人世界。」

朱晨麗儲錢換樓

至於朱晨麗表示若做生意，一定要有好拍檔。問到會否找緋聞男友何廣沛？她笑言：「冇傾過，你問吓何生想唔想，我考慮吓畀唔畀佢投資。」又稱目標是努力工作儲錢換樓：「想換大啲，換樓儲錢，咁樣先可以滾大舊錢。」她透露之前返蘇州探婆婆，慶幸冇被催婚。

陳庭欣跳起膝撞，楊振源頂得住。

朱晨麗心思思投資做生意。