陳展鵬激戰馮盈盈：多人打小報告！
藝員陳展鵬、馮盈盈和林夏薇在無綫新劇《逆天奇案》中有三角戀情，人夫周旋兩女之間，盈盈和夏薇又是陳太單文柔的好友，盈盈稱演出激烈感情戲時，曾打算跟單文柔備案，而展鵬更笑言四圍好多線眼打小報告！
與陳展鵬老婆單文柔（Phoebe）屬2016年同屆港姐的馮盈盈，日前在酒店與展鵬為新劇《逆天奇案》拍外景，她在劇中飾演潮爆黑客，形象非大家想像的宅女般，她以一身低胸魚網露臍裝上陣，相當亮眼！
向單文柔備案
劇中稍後情節，盈盈與展鵬有激烈感情戲份，盈盈笑言要跟Phoebe備案：「我哋同屆，都熟o架！知道同佢老公合作，即刻同佢講，我未主動講（感情戲），佢話已經知啦，佢都好明白，所以我嘅顧慮多餘咗，佢仲叫我唔使擔心！」
同林夏薇仲激
展鵬對盈盈的感情戲則未有太在意，他稱三角戀中反而與林夏薇的感情戲更激，面對盈盈只當她「細路女」，他在劇中周旋於老婆的好姊妹之間，笑言四圍好多線眼：「其實電視尺度有幾激吖，都係咁做(口架)啦！（同老婆啲朋友開工多線眼？）哈哈……多人打小報告啦，年頭因為擺滿月，請咗好多朋友，當中好多都係合作嘅演員，佢哋同我老婆講我好木，唔同人傾偈。」
問到可有打算讓老婆復出拍劇，他說：「佢都係入行一年多，之前拍綜藝多啲，我都會反映吓，最緊要佢自己舒服，因為依家有BB，佢都要適應。（掛住BB？）有掛o架！但一個主外一個主內，冇辦法啦！」