為黑面結婚解畫 張致恒老婆：我畀人恐嚇！

張致恒（Steven）今年7月突然在網上宣布與區燕雯（雯雯）的婚訊，並表示已育有一子張天寶，隨即被踢爆他一腳踏五船。雖然Steven已在社交平台道歉，但仍受千夫所指，其後他在9月初與雯雯在港註冊結婚，惟當日升呢張太的雯雯笑容牽強，幾乎全程黑面。

威脅對小朋友不利

事隔逾三星期，雯雯前晚終在社交網發長文解釋當日黑面的因由，她自稱收到不少侮辱及恐嚇的訊息，所以結婚時「疑神疑鬼」兼「無表情」，她說：「心深處係好開心同興奮，但實際上我係好驚好緊張好擔心。結婚前一個月，我收到好多受害人加埋陌生人一啲鬧我、侮辱我、恐嚇我甚至話要對我小朋友不利嘅訊息，所以結婚當日我完全控制唔到自己驚同擔心嘅表情，我只係一個普通人，第一次做媽媽，所以當日成日周圍望，個人好疑神疑鬼，冇咩表情。」

雯雯指這場婚姻在願意的情況下發生，結婚對她來說是一生一世的事，無論發生甚麼事定必會陪Steven走下去：「無論係祝福同唔祝福我嘅人，我都好想喺度講，依家所有嘅事已經唔係我一個人，我一定會努力學習兩個人嘅生活，會盡我嘅努力每一日令自己成長。」

嚴重會報警

對於太太自爆被恐嚇，Steven說：「一個月前，太太個Ig inbox不斷收到個唔知咩人嘅留言，叫太太小心啲，又認得我個仔個樣，其實曾經有好多個人send啲咁嘅嘢嚟。（你點保護老婆？）太太出入都陪住佢同埋小心啲，盡量唔帶個仔出街。（太太有冇得罪人？）冇。」問他可有報警備案？他表示不想搞大件事，但如果有嚴重事情發生，一定會報警處理。