高海寧惡妻上身呻管唔掂男友
藝人高海寧在熱播劇不僅飾演「虎媽」，連對老公也處處管束，但最後兒子失蹤，喊到回唔到氣！幸而現實的她與角色剛剛相反，她笑指不會管束男友鄧智偉之餘，反從對方身上學習創意，令其有所得着。
繼劇集《婚姻合伙人》初嘗當媽媽滋味後，高海寧（高Ling）最近再下一城，在無綫熱播劇《金宵大廈》中飾演育有8歲兒子的虎媽，為求兒子學業成績優異，即使工作繁忙仍不惜安排排山倒海的功課班及課外活動，令小朋友喘不過氣，實屬現今社會很多父母的寫照，可謂相當貼地。
由於故事講述奇幻，特別加插小朋友畏懼的虛構人物「鴉烏婆」情節，高Ling對此雀躍說：「細個瞓覺唔乖就會畀鴉烏婆捉走，想像佢嘅樣好似巫婆咁！呢個單元係令大家對呢樣嘢有新定義，入面又有溫情元素，帶出賺錢未必係最重要。」今次再演媽媽，她坦言冇難度，又指向來喜歡小朋友，所以一早與小演員建立好關係，沒料此舉還能牽動到演戲情緒：「有場戲係講我失去個仔好心痛，搵仔過程又好長，我喊到要坐喺地下回一回氣！嗰日仲要趕天黑前拍晒，都有壓力，過程一Shot落，情緒高低起伏，好期待出街係點。」
獲前輩遷就感窩心
談到與前輩陳嘉輝演夫妻，高Ling指對方給予鼓勵外，還不斷遷就其節奏，非常窩心。為配合廿四孝老公角色，嘉輝即使被狂鬧及過分管束仍默默承受，凸顯她的「妻管嚴」，問到現實中是否此類人？她說：「唔係！（男友鄧智偉都係一樣？）唔知，佢可能有想法，到時先算！佢唔會畀我管，藝術家嚟嘅，比較有創意，我都有跟佢學嘢，好似佢可以Carry到好多唔同類型嘅衫，品味比我好。」她又指將來不想做「虎媽」，不會對下一代有太多要求：「我係隨遇而安、享受當下，小朋友童年好重要，我童年好快樂，希望下一代都係咁，由得佢自由發揮。」