陳逸璇婚姻失敗晚晚匿埋喊
歌手陳逸璇（Jolie）相隔13年重返環球唱片公司懷抱，推出以離婚為主題的新歌《短暫的新分》。早年她與外籍前夫結束兩年半婚姻，新歌正是講述她的心聲：「用輕快嘅旋律形容已經事過境遷，幾年後回望有少少淡然、無奈，但發生咗就勇敢面對，有釋懷嘅感覺。」
渴望再次戀愛
她坦言最難捱是決定離婚前的感覺：「會責備自己係咪做得唔好？令到有個失敗嘅婚姻！我嗰陣唔開心到夜晚會扎醒匿埋喊，好似有個黑色漩渦捲咗你落去，爬極都爬唔番出嚟！嗰時係最痛苦，但好彩有家人同朋友支持。」事過境遷，她坦言成長很多：「細個比較嬌生慣養，記得第一次簽環球係乜都唔識嘅丫頭，今次再返環球，學懂珍惜機會同感恩，睇嘢都會理性啲，尤其感情方面。」
雖然曾婚姻失敗，但Jolie對愛情仍有憧憬：「但一定要多啲時間先敢付出，唔想再受傷，我都渴望再次戀愛。（會唔會唔敢再結婚？）少少驚，所以真係要睇清楚呢個人係咪值得付託終生，係咪有責任感去承擔婚姻同家庭嘅重任。」她坦言下次戀愛不再揀外國人：「之前嗰次唔成功，部分原因係文化差異，大家睇嘅嘢同想要嘅嘢唔同，好難行落去。今次prefer香港人，好多嘢唔需要解釋。」
抽離負面情緒
另外，昨日她到電台宣傳新歌《良品》，是《短暫的新分》延續篇：「呢首歌係另一階段，分手後難免情緒波動，好易畀負面情緒控制，亂諗嘢降低自己價值，但其實應該要抽離，提醒自己咁諗係唔啱。」
場地：柏寧酒店