葉蘊儀搣36磅肥肉回春拍寫真
現年46歲的葉蘊儀（Gloria），為拍寫真激減36磅「回春」，由大媽變回少女，半裸浸牛奶浴、跌膊文青Look、胸圍加喱士內褲站於酒店房窗邊，大晒98磅弗爆身形。她坦言與一對子女齊齊揀相，被讚影得非常有藝術美。
單身多年的葉蘊儀近年淡出娛樂圈，近作是5年前的無綫劇《女人俱樂部》，當時身材較為肥嘟嘟。不過她早前的起心肝減磅，結果皇天不負有心人，成功由134磅的肥師奶減至98磅，還一副勝利姿態赴日本影寫真，為最索時刻留倩影。
透視誘惑
她與工作人員於當地逗留6天，期間換上多個造型，Gloria毫不吝嗇身段，既半裸浸牛奶浴，又僅以雙手遮掩重要部位，35D上圍非常吸睛。她又真空上陣玩透視跌膊，並穿Bra配喱士內褲站於窗邊瞭望，雖然僅騷背部，但姿態非常誘人。
仔女讚靚
對於如此大膽，Gloria受訪時笑言視之為藝術品看待：「我又冇咩心理關口，唔覺得大膽，好自然呀！影之前都有同攝影師溝通，我想宣揚女性身體自主呢樣嘢，本書嘅序我有提及，呢個係我嘅藝術作品。我唔想停留喺廿幾歲，話畀人知我成長咗！我對仔女都係大學生，所以唔需要停留喺某一個階段，可以做自己想做嘅嘢。（仔女有咩反應？）我哋一齊揀相，佢哋都話靚，冇話性感之類，因為佢哋平時睇開外國電視。」