傷愈復出公仔箱 胡鴻鈞：永遠記唔番點受傷
藝人胡鴻鈞、余德丞、陳貝兒等前晚為汪明荃主持的《娛樂大家》任嘉賓，胡鴻鈞自早前拍戲吊威吔受傷後，已超過半年未有在電視上與觀眾見面，他表示已完全康復，但每隔兩、三個月要返醫院覆診：「每次照吓腦，相信一年左右就唔使再去。」他坦言受傷情況至今仍想不起，並打趣說：「醫生話應該永遠都係咁。（再吊威吔有陰影？）OK嘅，就係因為記唔起當時情況囉！」記者問他賦閒在家是否很悶，他笑說：「趁休息增值自己，尤其係我肥咗十幾磅，要花時間做運動。」
而曾是本港游泳代表隊成員的余德丞，得悉師兄方力申將挑戰環島游，習訓時連嘔多次，他說：「我哋本身係泳池游泳員，但換喺海一切唔同晒，加上11月游真係要注意體溫下降嘅問題，一定要補充體力，浪起亦要小心。」陳貝兒則透露《嫁到這世界邊端3》將於10月底推出，自爆拍攝期間有艷遇。