陳茵媺迎接「七年之癢」？啋！

藝人陳茵媺（Aimee）、高海寧、名模Ana R.、Rosemary及名媛張王幼倫昨日出席意大利文化節活動。Aimee透露生下大仔及結婚5周年時都曾到意大利旅行，計劃明年結婚7周年紀念，再遊意大利：「想去南意，因為意大利好大，我哋每次旅行都係去一星期。」並透露今年結婚周年也有外遊，但說：「返咗加拿大，不過老公要拍劇去唔到。（點補番？）我哋每年都會去一個Romantic trip嘅，佢唔使拍劇、拍戲就可以去，就番佢時間。」

問到可擔心七年之癢？她即笑說：「啋！No！（你哋仲好似拍拖咁sweet？）因為講好咗每年一定有個兩個人嘅Romantic trip，好重要！有咗3個小朋友之後，平時出街都係拖住小朋友，但呢個trip可以拍拖，有新嘅memory。」

高海寧則透露想去威尼斯參加當地每年2月舉行的面具節：「大家戴晒面具唔知咩樣，但又可以同對方做朋友，除咗面具可能係靚仔，會好開心。（叫男友鄧智偉成全你？）可以呀，佢都鍾意意大利。」記者提議她可以扮新娘出席？她笑說：「唔使嘅，有好多其他裝扮，佢哋都鍾意着宮廷裝。（你身材好着宮廷裝咪啱晒？）我同當地人比就小兒科啦！」

高海寧最想意國拍婚照

至於可會考慮在當地結婚？她說：「如果有機會都唔介意，但好難講，不過我覺得意大利品牌嘅婚紗特別靚，所以着意大利婚紗喺當地影結婚相都唔定，一諗起意大利就諗到浪漫。」