憑《變形金剛》（Transformers）系列上位的荷里活著名男星沙拉保夫（Shia LaBeouf），自編自演半自傳電影《寶貝童年》（Honey Boy），該片前晚在多倫多國際電影節（TIFF）舉行首映禮。電影講述阿沙與酗酒老竇之間的關係，他自爆父母睇戲時很難受！
除了阿沙外，導演及片中幾位演員都有出席首映禮，但與他因合作《寶》片而撻着的歌手女友FKA Twigs則沒有現身。《寶》片是阿沙根據童年經歷編寫的半自傳式電影，影射酗酒父親Jeffrey Craig LaBeouf與他的關係，以及他加入影壇被當搖錢樹的經過。
阿沙在片中飾演老竇Jeffrey，近日受訪時透露父母已經看了他的作品：「佢哋睇嗰時好難受，但我諗，佢哋亦都可以隔咗一層去睇。我意思係，佢哋關心自己個細路，多過娛樂圈呢啲嘢，你知嘛？佢哋知道如果我唔自豪，係唔會一齊分享。」
除了阿沙外，荷里活著名女星雲妮絲維嘉（Renee Zellweger）前日亦現身TIFF出席新片《Judy》首映禮，作品放映完畢後獲全場觀眾起立拍手。雲妮為觀眾的熱情感動落淚，笑說：「OK，停手喇，你會整花我個妝！」她在片中飾演已故荷里活著名女星茱地嘉蘭（Judy Garland），不少影評人對其演出讚不絕口，睇好她提名下屆奧斯卡金像獎最佳女主角。
此外，雲妮日前受訪時罕有地提及多年來的整容傳聞，現年50歲的她自爆當年被懷疑整容後，曾在街上被人冷嘲熱諷，令她感到難受及被羞辱！