藝人莫家淦今年5月再度榮升爸爸，日前他為細仔舉行百日宴，更趁機宣布細仔的中文名叫「莫皓賢」：「今次擺咗5圍招呼親友，除咗係細仔百日宴，亦順便為我爸爸、外母同姨婆一齊慶祝生日，好多親戚都賞面出席，場面好熱鬧。最搞笑係好多親戚問我哋幾時再追多個女，不過我同老婆都耍手擰頭，應該兩個夠晒數。」
講到細仔，他笑言發育良好：「依家細仔3個月大，已經好長肉，腳瓜起晒𦟌，同埋佢開始識得同人玩，成日都笑到騎騎聲，唔再好似之前一舊飯咁！」
