王敏德咀女老婆詐型

藝人王敏德(Michael)前晚出席手錶活動,獲太太馬詩慧及女兒王麗嘉撐場送吻,但他只錫錫女兒回禮,令太太「詐型」,最後要補飛呵番!Michael擔任設計師設計手錶,問到有否向太太取靈感?馬詩慧即「投訴」老公:「冇,佢唔會問我嘢,頭先你哋睇唔到玄機咩?(指老公錫女先),我喺兩個女同一個仔之下。」Michael即搞笑表示同意。

談到設計靈感,他指想加添中國特色:「做咗咁多年飛虎隊嘅角色,亦都係一個機師,自己都好驕傲。」對於早前太太投訴不夠家用,問到酬勞會否給她?他說:「間公司太太都有份,我乜都畀晒佢,你睇吓我個樣幾辛苦。」近日市道低迷,問會否擔心影響銷量?他說:「我有睇新聞,知道影響緊經濟,但大家要向前行,想每個人都開開心心。」