「呃飯食」言論被寸 湯洛雯認衰：講嘢冇經大腦

黎諾懿、湯洛雯、謝雪心、鄧佩儀、丁子朗及蔣家旻等，為昨晚播出的綜藝節目《跨跨跨世代》宣傳，眾人即場搓湯圓預祝中秋，謝雪心大享「小鮮肉」之福，被黎諾懿及丁子朗餵湯圓，靚湯亦唔執輸主動餵「小鮮肉」，最後黎諾懿竟雙手捧碗給游嘉欣要求被餵，認真唔識死！

唔會嬲何浩文

靚湯前晚在港姐台上取笑佳麗姚懿芠「呃飯食」，引來何浩文（Dominic）寸爆口齒不清，昨日她公開致歉：「其實係節目效果，識我嘅人都知我成日搞笑，有時講嘢又口沒遮攔，冇經大腦，如果令佳麗有Hard Feeling，我喺度講聲唔好意思，亦多謝Dominic咁撐香港小姐。（嬲？）唔會，佢睇得投入先會有咁嘅言論。」問到與Dominic私下是否相熟？她表示曾一同參加飯局，但沒有交談，問之後見面會否尷尬？她說：「咁大個人，唔會一、兩句說話就尷尬。」

黎諾懿怕睇厭

而黎諾懿透露在節目中跟靚湯齊齊創業，大呻生意難做：「我有夾哥哥、細佬開車房，但因為地方唔夠，租又貴，最近由新蒲崗搬咗入屯門。」他坦言投資了6位數字，至今已營運6、7年，保持有錢賺：「依家請人好難，好彩細佬考咗機電工程牌，會落場幫手整車。其實我都識整車，但可能會生疏。」記者笑指他成了無綫「寵兒」，亮相多部劇集及綜藝節目，霸盡黃金時段，他謙虛說：「唔好咁講，都係做吓嘢啫！」又抵死笑說：「其實做完《跨》就會接播我另一個節目《長命不老》，公司都驚觀眾悶，所以另一套劇《C9特工》唔播住。」